ໃນລະຫວ່າງວັນທີ 22-23 ມັງກອນ 2025 ທີ່ຜ່ານມາ ສູນຄົ້້ນຄວ້າເຂົ້າ ແລະ ພືດເສດຖະກິດໄດ້ຈັດພິທີ ຝຶກອົບຮົມໃຫ້ແກ່ຊາວນາກຸ່ມຜະລິດເຂົ້າທີ່ ບ້ານໝາກຮຽວ ແລະ ບ້ານໝາກນາວເໜືອ ເມືອງປາກງື່ມ ນະຄອນຫຼວງວຽງຈັນ, ໂດຍການເຂົ້າຮ່ວມ ຂອງທ່ານ ນ. ຄຳໄຕ ວົງໄຊຍາ ຮອງຫົວໜ້າສູນຄົ້້ນຄວ້າເຂົ້າ ແລະ ພືດເສດຖະກິດ, ມີຕາງໜ້າຈາກສູນໂກເປຍ (KOPIA) ປະຈຳ ສປປ ລາວ, ປະສານງານກະສິກຳຂັ້ນເມືອງ, ປະສານງານກະສິກຳທັງສອງບ້ານ, ບັນດາຄູຝຶກວິຊາການ ຈາກສູນຄົ້້ນຄວ້າເຂົ້າ ແລະ ພືດເສດຖະກິດ ແລະ ສະມາສິກຊາວນາກຸ່ມຜະລິດໃໝ່ກຸ່ມທີ່ 3 ເຂົ້າຮ່ວມທັງໝົດ ຈຳນວນ 86 ຄົນ, ຍິງ 30 ທ່ານ.
ຈຸດປະສົງຂອງການຝຶກອົບຮົມໃນຄັ້ງນີ້ແມ່ນ (1). ເພື່ອຖ່າຍທອດບົດຮຽນ, ປະສົບການ, ຄວາມຮູ້ເຕັກນິກຕ່າງໆ ຈາກສູນສະຖານີຄົ້ນຄວ້າຂອງພາກລັດໃຫ້ກຸ່ມຊາວນາເປົ້າໝາຍໂຄງການ.(2) ເພື່ອເຜີຍແຜ່ແລກປ່ຽນບົດຮຽນປະສົບການໃຫ້ຊາວນາສາມາດຫັນເປັນຜູ້ຜະລິດເຂົ້າເພື່ອເປັນສີນຄ້າໃນຊຸມຊົນເຂົາເຈົ້າໄດ້. ການຝືກອົບຮົມຄັ້ງນີແມ່ນໃຊ້ເວລາ 2 ວັນ ໂດຍການເປັນຄູຝຶກຂອງນັກຄົ້ນຄວ້າຈາກສູນຄົ້້ນຄວ້າເຂົ້າ ແລະ ພືດເສດຖະກິດ, ການຝຶກອົບຮົມແມ່ນນຳສະເໜີພາກທິດສະດີ ຜູ້ເຂົ້າຮ່ວມໄດ້ຮຽນຮູ້ກ່ຽວກັບເຕັກນິກວິທີການປູກເຂົ້າແບບຕ່າງໆ, ເຕັກນິກການຈັດການຝຸ່ນ, ປູ໋ຍແບບປະສົມປະສານ, ເຕັກນິກການຈັດການສັດຕູພືດແບບປະສົມປະສານ, ເຕັກນິກການຈັດການນ້ຳ ແລະ ຈັດການຫຍ້າ ຕະຫຼອດຮອດວິທະຍາການຫລັງການເກັບກ່ຽວ. ການຝຶກອົບຮົມໃນຄັ້ງນີ້ໄດ້ດໍາເນີນໄປດ້ວຍຄວາມຟົດຟື້ນ, ໄດ້ທັງບັນຍາກາດ ແລະ ຄວາມຮູ້ ເຊິ່ງເຫັນໄດ້ຈາກການແລກປ່ຽນທາງດ້ານປະສົບການໃນການຈັດຕັ້ງປະຕິບັດຕົວຈິງຢູ່ໃນພື້ນທີ່ຂອງຕົນ ເຊິງນັກສໍາມະນາກອນແຕ່ລະພາກສ່ວນໄດ້ຊີ້ໃຫ້ເຫັນຈຸດດີ, ຈຸດອ່ອນ, ໂອກາດ ແລະ ອຸປະສັກ ຂອງການຜະລິດເຂົ້າຢູ່ພາຍໃນພື້ນທີນາຂອງຕົນເອງ, ເຊິ່ງນັກສໍາມະນາກອນສ່ວນໃຫຍ່ຈະໃຫ້ຂໍ້ຄິດເຫັນເປັນສຽງດຽວກັນວ່າການຜະລິດເຂົ້າຍັງມີບັນຫາ ແລະ ຂໍ້ຈໍາກັດຢູ່ຫຼາຍດ້ານ ເຊັ່ນ: ຕົ້ນທຶນການຜະລິດສູງ, ສະພາບການປ່ຽນແປງດິນຟ້າອາກາດ ແລະ ບັນຫາການລະບາດຂອງພະຍາດ ແລະ ແມງໄມ້, ຂໍ້ຈໍາກັດທາງດ້ານແນວພັນ ແລະ ຂໍ້ຈໍາກັດທາງດ້ານຄວາມຮູ້ເຕັກນິກການຍົກສະມັດຕະພາບ ແລະ ການເກັບຮັກສາໃຫ້ໄດ້ຄຸນນະພາບຂອງຜົນຜະລິດ.
ຂຽນໂດຍ: ທ. ແລະ ໂຮມແສງຈັນ ສູນຄົ້້ນຄວ້າເຂົ້າ ແລະ ພືດເສດຖະກິດ
Users Today : 316
Users Yesterday : 54
This Month : 370
This Year : 79796
Total Users : 787786