ກອງປະຊຸມແລກປ່ຽນຄວາມຮູ້ທາງດ້ານເຕັກໂນໂລຢີຊົນລະປະທານ ຢູ່ ເມືອງ ບີກາສິ  ປະເທດອິນໂດນີເຊຍ ໃນລະຫວ່າງວັນທີ່  27/10 ຫາ 02 / 11/2024

ການເຂົ້າຮ່ວມກອງປະຊຸມແລກປ່ຽນບົດຮຽນທາງດ້ານເຕັກໂນໂລຢີຊົນລະປະທານ, ຕາມຄຳເຊີນໃນນາມກອງເລຂາກຳມາທິການແມ່ນໍ້າຂອງສາກົນ (MRCS)ໄດ້ເຊີນຜູ້ເຂົ້້າຮ່ວມປະຊຸມຈາກບັນດາປະເທດສະມາຊິກລຸ່ມແມ່ນໍ້າຂອງ ລາວ, ໄທ ແລະ ຫວຽດນາມ, ໂດຍໃຫ້ການສະໜັບສະໜູນທຶນຈາກລັດຖະບານອິນໂດນີເຊຍ, ກະຊວງໂຍທາທິ. ກອງປະຊຸມສຳມະນາຄັ້ງນີ້ ແມ່ນໄດ້ຈັດຂື້້ນ ໃນລະຫວ່າງວັນທີ່  27 ຕຸລາ ຫາ 02 ພະຈິກ 2024 ຢູ່ ເມືອງ ບີກາສິ ປະເທດອິນໂດນີເຊຍ

ພາຍໃຕ້ການເປັນປະທານຮ່ວມລະຫວ່າງ ຜູ້ອຳນວຍການທົ່ວໄປຂອງຫ້ອງການຊັບພະຍາກອນນໍ້າ ສູນວິສະວະກຳຊົນລະປະທານ ແລະ ທ່ານ ອານຸລັກ ກິດຕິຄຸນ ຫົວໜ້າຫ້ອງການບໍລິຫານ ກອງເລຂາຄະນະກຳມາທິການແມ່ນໍ້າຂອງສາກົນ (MRC), ກອງປະຊຸມດັ່ງກ່າວ ໄດ້ມີແຂກມາຈາກຫລາຍພາກສ່ວນ, ຜູ້ປະສານງານກອງເລຂາ, ປະເທດສະມາຊິກລຸ່ມແມ່ນໍ້າຂອງ ລາວ ແລະ ແຂກຈາກພາຍໃນປະເທດ ອິນໂດເນເຊຍ ທັງໝົດ 37 ທ່ານທີ່ເຂົ້າຮ່ວມ

ຈຸດປະສົງ: ແມ່ນເພື່ອແລກປ່ຽນບົດຮຽນທາງດ້ານເຕັກໂນໂລຢີຊົນລະປະທານເພື່ອແນໃສ່ເສີມຂະຫຍາຍຄວາມຮູ້, ຄວາມຊຳນານ, ທັກສະ ແລະ ການຮ່ວມມືືໂດຍສຸມໃສການປະຕິບັດການຄຸ້ມຄອງດິນແຫ້ງແລ້ງ, ລວມເຖິງການວາງແຜນ ແລະ ການອອກແບບ, ການດຳເນີນງານ ແລະ ບຳລຸງຮັກສາລະບົບຫົວງານນໍ້າຊົນລະປະທານ, ລະບົບຕາໜ່າງຊົນລະປະທານທີ່ນຳໃຊ້ນໍ້າໃຕ້ດິນ ແລະ ລະບົບເຂື່ອຄ່າຍລະບົບຊົນລະປະທານທາງຜ່ານປາ. ກອງປະຊຸມໄດ້ດຳເນີນໄປເປັນເວລາ 5 ວັນ ໄດ້ມີການນຳສະໜີ ແລະ ສົນທະນາແລກປຽ່ນກ່ຽວກັບຊົນລະປະທານປະຢັດນໍ້າຢູ່ເຂດແຫ້ງແລ້ງ, ການແນະນຳກ່ຽວກັບຊົນລະປະທານຂະໜາດນ້ອຍ, ການອອກແບບເຂື່ອຄ່າຍຊົນລະປະທານສຳລັບສະປິງເກີນໍ້າ, ການອອກແບບຫົວສີດນໍ້າທີ່ເໝາະກັບຊົນລະປະທານ, ການບຳລຸງຮັກສາ, ການກວດກາຄຸນນະພາບຫົວສະປິງເກີ, ສຳຫລວດ ແລະ ສຶກສານໍ້າໃຕ້ດິນ, ການວ່າງແຜນ ແລະ ອອກແບບຊົນລະປະທານທີ່ເປັນມິດກັບທາງຜ່ານປາ , ລົງພື້ນທີ່ຈຳລອງປະສິດທິພາບການນຳໃຊ້ຫົວສີດນໍ້າໃນພື້ນທີ່ກະສິກຳ ແລະ ສຸດທ້າຍແຕ່ລະກຸ່ມກໍໄດ້ນຳສະເໜີຂໍ້ມູນສະພາບພື້ນທີ່, ພູມອາກາດ ແລະ ລະບົບການໃຊ້ນໍ້າ ປະເທດຂອງຕົນ ເພື່ອປະກອບຂຽນໂຄງການທົດລອງຂະໜາດນ້ອຍ ເພື່ອທຳການທົດລອງຫົວສີດນໍ້າຕໍ່ກັບພື້ນທີ່ເຮັດກະສິກຳປູກຝັງ.

ຂ່າວ: ປອ ນ. ຕິກ ນວນທະວົງ, ຮອງຫົວໜ້າພະແນກບໍລິຫານ ແລະ ແຜນການ