ການສຳຫຼວດສຸຂະພາບປ່າໄມ້ແບບວ່ອງໄວ ແລະ ກອງປະຊຸມຮ່ວມກັບຊາວກະສິກອນຂະໜາດນ້ອຍ “ໂຄງການພັດທະນາເຄືອຂ່າຍສຸຂະພາບປ່າໄມ້ ແລະ ຄວາມປອດໄພຊີວະພາບ”ACIAR-FST/2020/123

ໃນລະຫວ່າງວັນທີ 31 ຕຸລາ ຫາ 1 ພະຈິກ 2024 ສູນຄົ້ນຄວ້າປ່າໄມ້, ໂຄງການພັດທະນາເຄືອຂ່າຍສຸຂະພາບປ່າໄມ້ ແລະ ຄວາມປອດໄພຊີວະພາບ  ACIAR-FST/2020/123 ໄດ້ຝຶກອົບຮົມການສຳຫຼວດສຸຂະພາບປ່າໄມ້ແບບວ່ອງໄວ ແລະ ກອງປະຊຸມຮ່ວມກັບຊາວກະສິກອນຂະໜາດນ້ອຍ ໂດຍການເປັນປະທານຂອງທ່ານ ປອ. ສິງກອນ ໄຊຍະລາດ ຮອງຫົວໜ້າສູນຄົ້ນຄວ້າປ່າໄມ້, ເຂົ້າຮ່ວມກອງປະຊຸມໃນຄັ້ງນີ້ວິຊາການສູນຄົ້ນຄວ້າປ່າໄມ້, ຕາງໜ້າຈາກສູນຄົ້ນຄວ້າພືດຜັກ ແລະ ໄມ້ໃຫ້ໝາກ, ຕາງໜ້າຈາກສູນປ້ອງກັນພືດ, ຕາງໜ້າຈາກຄະນະວິທະຍາສາດປ່າໄມ້, ຕາງໜ້າຈາກຄະນະວິທະຍາສາດສັງຄົມ, ຜູ້ປະສານງານໂຄງການ ACIAR, ຕາງໜ້າຈາກໂຄງການ University of TASMANIA ມີຜູ້ເຂົ້າຮ່ວມທັງໝົ້ດ 23 ທ່ານ, ຍິງ 6 ທ່ານ.

ຈຸດປະສົງຂອງກອງປະຊຸມໃນຄັ້ງນີ້ແມ່ນເພື່ອໃຫ້ຜູ້ເຂົ້າຮ່ວມມີທັກສະ ແລະ ຄວາມຮູ້ທີ່ຈຳເປັນໃນການດຳເນີນການສຳຫຼວດຢ່າງມີປະສິດທິພາບໃນການກວດສອບ ແລະ ຕິດຕາມສັດຕູພືດປ່າໄມ້ ແລະ ພະຍາດໃນເຂດພື້ນທີ່ທີ່ມີຄວາມສ່ຽງສູງ. ຊື່ງມີຫົວຂໍ້ຝຶກອົບຮົມທັງໝົດ 7 ຫົວຂໍ້ດັ່ງນີ້:

1. ການແນະນຳການສຳຫຼວດແບບວ່ອງໄວ
2. ການກະກຽມການສຳຫຼວດ
3. ວິທີການສຳຫຼວດຕາມເສັ້ນທາງ
4. ການເກັບກຳຂໍ້ມູນ ແລະ ການບັນທຶກ
5. ການຝຶກໃນການສຳຫຼວດພາກສະໜາມ
6. ຂັ້ນຕອນຫຼັງການສຳພາດ
7. ການຕອບສະໜອງ ແລະ ການຕິດຕາມ

ການຝຶກອົບຮມດັ່ງກ່າວນີ້ຖືກອອກມາແບບມາເພື່ອໃຫ້ຜູ້ເຂົ້າຮ່ວມໄດ້ຮັບປະສົບການໃນພາກປະຕິບັດ ແລະ ຄວາມຮູ້ທາງປະຕິບັດກ່ຽວກັບວິທີການສຳຫຼວດແບບວ່ອງໄວ. ຜູ້ເຂົ້າຮ່ວມຈະມີຄວາມຮູ້ວິທີການກຳນົດສະຖານທີ່ທີ່ມີຄວາມສ່ຽງສູງ, ດຳເນີນການສຳຫຼວດຕາມເສັ້ນທາງ, ເກັບຮັກສາ ແລະ ບັນທຶກຂໍ້ມູນພ້ອມທັງເຂົ້າໃຈຄວາມສຳຄັນຂອງການກວດຫາແບບວ່ອງໄວໃນການຮັກສາສຸຂະພາບປ່າໄມ້.

ຂ່າວໂດຍ: ສຸລິວົງ ກອງມະນີວົງ ສູນຂໍ້ມູນຂ່າວສານກະສິກຳ ແລະ ປ່າໄມ້